МУИС-ийн ШУС-ийн Европ судлалын тэнхимийн герман судлалын хамт Монголын Герман Хэлний Багш нарын Холбоотой (МГХБХ) хамтран МУИС-д хэрэгжиж ирсэн Хэл шинжлэл /Герман/, Герман хэл, орон судлал хөтөлбөрийн төгсөгч нарт зориулан 2022 оны 1 сарын 26-нд давтан сургалт зохион байгууллаа. Хөтөлбөрийн төгсөгч нарын дунд төрийн өмчийн болон хувийн хэвшлийн ЕБС, хэлний сургалтын төвүүдэд багшаар ажиллаж буй олон төгсөгч байдаг ба 2021 оны 11 сарын 20-нд НАЙРАМДАЛ ОУХЦ-т зохион байгуулсан МГХБХ-ны гишүүдийн уулзалтын үеэр тэдний хэрэгцээ, шаардлагыг тодруулан санал асуулга явуулсны үндсэн дээр энэхүү сургалтыг санаачилжээ.

МУИС-ийн ШУС-ийн Европ судлалын тэнхимийн ахлах багш Г.Гэрэлмаа “Герман хэлний хичээлээр суралцагсдын сонсох чадварыг хөгжүүлэх нь” сэдвээр, ​​Монгол-Германы хамтарсан ашигт малтмал, технологийн их сургуулийн ахлах багш Б. Батсүрэн “Герман хэлний заах арга зүй” сэдвээр сургалтыг удирдан явууллаа.

Сургалтыг танхимаар болон Google Meet платформ ашиглан цахимаар зэрэг зохион байгуулж, танхимд 10, цахимаар 9 багш сургалтад хамрагдаж, сургалтын төгсгөлд гэрчилгээ гардуулав.

Цаашид сургалтыг тогтмолжуулж улиралд 1-2 удаа энэ төрлийн мэргэжил дээшлүүлэх сургалтыг герман судлалын хөтөлбөрийн төгсөгчдийн дунд болон герман хэлний багш нарын дунд зохион байгуулахаар герман судлалын хамт олон МГХБХ-той хамтран төлөвлөөд байна.