Энэхүү семинарын гол зорилго нь Европын олон хэлний суурь хөтөлбөрийг танилцуулахаас гадна ШУС-ийн ХУС-ын Европ судлалын тэнхимийн мэргэжлийн хөтөлбөрүүдийг танилцуулах, орос хэлний мэргэжлийн болон бэлтгэл ангийн хөтөлбөрийг сурталчлах, цаашид хамтран ажиллах боломжийн талаар санал солилцох байв.

Семинарын үеэр Европын хэлний тэнхимийн эрхлэгч С.Булгантамир герман, испани, итали, орос, франц, польш, чех хэл судлалын хэл шинжлэл, орчуулга, олон улс орон судлал, боловсрол судлал хөтөлбөрүүдийг танилцуулав. Тус тэнхимийн багш Д.Энхтуул МУИС-ийн орос хэлний хөтөлбөр, орос хэлний бэлтгэл анги, ОХУ-ын их, дээд сургуульд тэтгэлгээр суралцах боломжийн талаар ярилаа. Мөн герман хэлний ахлах багш М.Одонтуяа Европын олон хэлний суурь хөтөлбөрийн зарчим, түвшин, үнэлгээний талаар танилцууллаа.

Семинарт ЕБ-ын 80 гаруй сургуулийн заах аргазүйн 90 гаруй төлөөлөгч оролцож, хөтөлбөр, гадаад хэлний сургалт, мэргэжлийн талаар асуулт асууж идэвхитэй оролцов.

Семинарын үр дүнд Нийслэлийн ЕБС-ийн ахлах ангийн сурагчидтай дүүрэг дүүргээр уулзалт зохион байгуулж, мэргэжлийн чиг баримжаа, тэнхимийн хөтөлбөрүүд, Европын орнуудын хэлээр МУИС-д суралцах боломжийн талаар сургалт, яриа хийхээр болов.