Япон Улсын Шинжлэх ухаан, технологийн агентлагийн санхүүжүүлэлтээр МУИС-ийн профессор О.Болормаа болон Япон Улсын Мияазакигийн Их Сургуулийн профессор Коичиро Шиомори нарын хариуцан хэрэгжүүлдэг “САКУРА” оюутан солилцооны хөтөлбөр цахим хэлбэр (ZOOM аппликейшн)-ээр 2021 оны 12-р сарын 26-28-ны өдрүүдэд зохион байгуулагдлаа. Энэ удаагийн хөтөлбөрт Мьянмарын Холбооны Бүгд Найрамдах Улсын Янгоны Их Сургууль хамрагдсанаараа онцлог байв. Уг хөтөлбөрт МУИС-ийн Шинжлэх Ухааны Cургуулиас бакалаврын болон ахисан түвшний долоон оюутан, гурван багш; Янгоны Их Сургуулиас ахисан түвшний 10 оюутан, дөрвөн багш; Мияазакигийн Их Сургуулиас бакалаврын болон ахисан түвшний зургаан оюутан, дөрвөн багшийн хамт тус тус оролцсон.

Хөтөлбөрийн хүрээнд гурван улсын их сургуулиудын оюутнууд эх орон, төрөлх их сургуулиа англи хэл дээр танилцуулсан бөгөөд Монголын болон МУИС-ийн тухай илтгэл сонирхол ихээр төрүүлж, бүгдэд таалагдав. Мөн ахисан түвшний оюутнуудын дунд олон улсын семинар (workshop) зохион байгуулагдаж, оюутнууд өөрсдийн хийж буй судалгааны ажлаа англи хэл дээр танилцуулан, илтгэлээ хэлэлцүүлсэн. Оюутан солилцооны хүрээнд гурван улсын оюутнууд Япон хэлний богино хугацааны хичээлд хамрагдаж, тоглоомын хэлбэрээр идэвхитэй дүрд тоглож бие биентэйгээ танилцсан болно. Хөтөлбөрийн сүүлийн өдөр Мияазакигийн Их Сургуулийн дөрвөн профессор, МУИС-ийн профессор О.Болормаа нар судалгааны ажлынхаа талаар лекц уншиж, илтгэл хэлэлцүүлснээр энэ удаагийн оюутан солилцооны онлайн хөтөлбөр амжилттай хэрэгжиж дууссан.