Монгол Улс, БНХАУ-ын хооронд дипломат харилцаа тогтоосны 75 жилийн ойн хүрээнд Хятадын нэрт зохиолч Үй Хуагийн зохиолоос сэдэвлэсэн Орфей театрын шинэ бүтээл “Амьдрахуй” жүжгийн уран бүтээлчидтэй уулзалт хэлэлцүүлгийг ШУС-ийн Хүмүүнлэгийн ухааны салбарын Ази судлалын тэнхим, Утга зохиол, урлаг судлалын тэнхим хамтран 2024 оны 12 дугаар сарын 18-ны өдөр зохион байгууллаа. Уулзалтад Орфей театрын найруулагч М.Батболд, зохиолч орчуулагч Мө.Батбаяр нар хүрэлцэн ирж, 10 дугаар сард нээлтээ хийсэн уг жүжгийн үзэл санаа, тавилт, дүрүүдийн онцлог хийгээд орчуулгын асуудал зэрэг өргөн хүрээг хамарсан сэдвээр халуун дотно яриа өрнүүллээ. “Уг жүжиг нь амьдрал, оршихуйн мөн чанарын талаар болон нийгмийн эмзэг асуудлыг тусгаж чадсанаараа онцлогтой юм” хэмээн найруулагч М.Батболд онцлон тэмдэглэв. Хятад хэлний орчуулга, утга зохиол судлал, хятад орон судлал, монгол хэл, уран зохиолын боловсрол хөтөлбөрийн оюутнууд сонирхсон асуултдаа хариулт авч, уран бүтээлчдэд санал бодлоо чөлөөтэй илэрхийлсэн сонирхолтой хэлэлцүүлэг боллоо.